Daga Sanee Yarima, Jalingo
Kwamishiniyar ‘yan sandan jihar Taraba, CP Betty Otimenyin ta karfafa gwiwar ‘yan matan Sakandare da su zabi ‘yan sandan Najeriya a matsayin sana’a bayan kammala karatunsu.
Ta bada shawaran ne a ziyarar da ta kai wasu zababbun makarantun Sakandare guda biyu a Jalingo, babban birnin jihar.
Shirin wayar da kan Makarantun Sakandare na daga cikin ayyukan da aka jera domin bukin cika shekaru 70 da samun mata kan aikin ‘yan sanda a Najeriya, wanda rundunar ‘yan sandan Najeriya ta shirya a fadin kasarnan.
Makarantun da Kwamishinan ‘Yan Sandan ta jihar Taraba, Betty Otimenyin ta ziyarta, sun hada da Makarantar Sakandaren Kimiyya ta Gwamnati, da Kwalejin Mata na Gwamnatin Tarayya (FGGC), Jalingo.
Da take jawabi a makarantar sakandiren kimiyya ta gwamnati dake Jalingo, wacce ta hada maza da mata, CP Betty Otimenyin ta shawarci dalibai da su mai da hankali kan karatunsu tare da gargadi kan amfani da muggan kwayoyi da nisantar aikata sauran laifuka.
Kwamishinan ‘yan sandan ta bayyana rundunar ‘yan sandan Najeriya a matsayin sana’a mai daraja, inda ta jaddada bukatar matasa mata su samu damar shiga kwalejojin ‘yan sanda don yin karatun duk wani kwas da suke da muradi.
CP Betty Otimenyin ta shaida wa mahukuntan makarantun da dalibai cewa, rundunar ta himmatu wajen tabbatar da samar musu da isasshen tsaro.
Tun da farko a jawabin ta, Kwamishinan Ilimi ta Jihar Taraba, Dakta Augustina Godwin, ta yabawa CP Betty da tawagarta bisa kokarinsu na samar da isasshen tsaro a makarantun jihar, tana me cewa samar da tsaro da ilimi kyauta su ne manyan abubuwan da gwamnatin Gwamna Agbu Kefas ta sa a gaba, kana ta shawarci daliban da su kasance masu kula da harkokin tsaro.
Kazalika, Dokta Augustina Godwin ta sanar da cewa nan ba da jimawa ba makarantar da sauran su, za su karbi rigar su kyauta da sauran kayan koyon karatu, kuma nan bada jumawa ba gwamnatin jihar za gyara dukkan makarantun ta.
A jawaban su daban-daban, Shugaban Makarantar Sakandaren Kimiyya ta Gwamnati da ke Jalingo, Ibrahim Moddibo da takwaran sa ta FGGC, Uwargida Justina Isaac Kure sun yaba wa CP Betty Otimenyin bisa zabar makarantun su domin murnan shekaru saba’in da samun Mata cikin aikin Dan’sanda.
Sun kuma mika sakon godiyan su zuwa Gwamna Agbu Kefas bisa kokarin sa na baiwa bangaren tsaro da ilimi fifiko.
